ღონისძიებები

ათასწლეულის სკოლის პროექტ “საუკუნის გაცვლის” ფარგლებში, ჩვენი სკოლისთვის ნაყოფიერი და ემოციებით დატვირთული კვირა შედგა.

გაცვლითი პროგრამით თბილისს ჩვენი სკოლის ქიმიის მასწავლებელი ნინო ბოჭორიშვილი და მე-10 კლასის მოსწავლე ქეთი ბენიძე ესტუმრნენ. მათ ერთი კვირა ათასწლეულის სკოლაში გაატარეს, სადაც აქტიურად ჩაერთნენ სასწავლო პროცესში.

ამავდროულად, ჩვენს სკოლას დედაქალაქიდან ესტუმრნენ ქიმიის მასწავლებელი დემეტრე ნარსია და მე-9 კლასის მოსწავლე ნიკოლოზ ჭოველიძე.

პროექტის ფარგლებში ჩვენი სკოლის წარმომადგენლები დეტალურად გაეცნენ სწავლების განსხვავებულ, ინოვაციურ მეთოდებსა და პროგრამებს. განსაკუთრებით მნიშვნელოვანი და საინტერესო აღმოჩნდა საბუნებისმეტყველო საგნების მიმართულებით პროექტზე დაფუძნებული სწავლების (PBL) პროგრამების გაცნობა. მასწავლებლებმა ერთმანეთს გაუზიარეს ინტერაქციული რესურსები, რაც სასწავლო პროცესს კიდევ უფრო მრავალფეროვანსა და დინამიკურს გახდის.

აღსანიშნავია, რომ ამ პროცესის პარალელურად სკოლებს შორის გაფორმდა მემორანდუმი. ეს დოკუმენტი თანამშრომლობის უფრო მაღალ საფეხურზე გადასვლას გულისხმობს, რაც ორივე მხარეს სამომავლო გეგმების ჩამოყალიბებაში დაეხმარება.

გაცვლითი პროგრამა მონაწილეებს ეხმარება ისეთი უნარების განვითარებაში, როგორიცაა უცხო გარემოში ადაპტირება, გუნდური მუშაობა, კომუნიკაცია და პრობლემების სისტემური ანალიზი.

ჩვენი სკოლა აგრძელებს ზრუნვას თანამედროვე საგანმანათლებლო სივრცის შექმნაზე, სადაც გამოცდილების გაზიარება და მუდმივი განვითარება პრიორიტეტია.

ძვირფასო მშობლებო, მოხარული ვართ გაგიზიაროთ პროექტის „მშობელთა ჩართულობა სკოლაში“ დაწყების შესახებ.

ამ ინიციატივის ერთ-ერთი უმნიშვნელოვანესი მიმართულება მოსწავლეთა პროფესიული ორიენტაციის ხელშეწყობაა.

ჩვენი მიზანია, ბავშვებს დავეხმაროთ მომავლის სწორად დაგეგმვაში და გავაცნოთ მათ პროფესიული სამყაროს მთელი მრავალფეროვნება.

12 დეკემბერს პროექტის ფარგლებში პირველი სამუშაო შეხვედრა გაიმართა. ისტორიისა და მათემატიკის მასწავლებლებმა, სოფო კლდიაშვილმა და თამუნა ბრეგაძემ, მშობლებს წარუდგინეს პრეზენტაცია პროფორიენტაციის პროცესში ოჯახის როლის მნიშვნელობაზე.

შეხვედრა წარიმართა ინტერაქციულ რეჟიმში, სადაც მშობლებმა ღიად ისაუბრეს საკუთარ გამოცდილებასა და იმ საჭიროებებზე, რომელთაც ისინი შვილების პროფესიულ გზაზე დახმარებისას აწყდებიან.

ჩვენ გვჯერა, რომ თქვენი პროფესიული გამოცდილება მოსწავლეებისთვის შესაძლოა ნამდვილ აღმოჩენად იქცეს.განსაკუთრებით მნიშვნელოვანია ბავშვებისთვის იშვიათი და ნაკლებად ცნობილი პროფესიების გაცნობა, რაც მათ თვალსაწიერს გაუფართოებს და დაეხმარებათ დაინახონ მეტი შესაძლებლობა საკუთარი თავის რეალიზებისთვის.

წინ კიდევ ბევრი საინტერესო ეტაპია. მომავალ შეხვედრებზე, რომლებსაც მოწვეული სტუმრებიც დაესწრებიან, დეტალურად განვიხილავთ-

პროფესიული ორიენტაციის პროცესს;

ყურადღება დაეთმობა მოსწავლის ინტერესების, შესაძლებლობებისა და უნარების იდენტიფიცირებას, რათა კიდევ უფრო განმტკიცდეს მშობლის როლი ამ რთულ, მაგრამ საინტერესო პროცესში.

პროფესიის არჩევა ადამიანის ცხოვრებაში ერთ-ერთი ყველაზე აქტუალური და საპასუხისმგებლო ნაბიჯია. სკოლისა და მშობლების ერთიანი ძალისხმევა არის გარანტი იმისა, რომ ჩვენი მოსწავლეები სწორ არჩევანს გააკეთებენ.

მოდით, ერთად დავეხმაროთ მათ მომავლის წარმატებით შენებაში. სკოლა და მშობლები ერთიანი მიზნისთვის!