ღონისძიებები

დეტექტიური თავგადასავალი და „წიგნის მაძიებელთა ორდენის“ ფიცი!

2 თებერვალს, წიგნის საჯაროდ კითხვის მსოფლიო დღეს, ჩვენი სკოლის მე-10 კლასის ქართული ენისა და ლიტერატურის გაკვეთილი საკლასო ოთახის ფარგლებს გასცდა და ნამდვილ აზარტულ მარათონად იქცა!

ქართული ენისა და ლიტერატურის მასწავლებელმა, ბელა გიორხელიძემ, მოსწავლეებს უჩვეულო გამოწვევა მოუწყო — სკოლის ლაბირინთებში უნდა ეპოვათ დამალული საგანძური. თუმცა, სანამ ძიება დაიწყებოდა, მოსწავლეებმა, როგორც „წიგნის მაძიებელთა ორდენის“ წევრებმა, საზეიმო ფიცი დადეს:

„ვდებ ფიცს, ვიქნები დაკვირვებული, როგორც შერლოკი და სამართლიანი მეგობრების მიმართ; არ შემეშინდება რთული გამოცანების და ნაპოვნ საგანძურს მოვეპყრობი უდიდესი მზრუნველობით. თუ ფიცს გავტეხ, ჩემი საყვარელი პერსონაჟი წიგნიდან გაიქცეს და მხოლოდ თეთრი ფურცლებიღა დამრჩეს!“

ამ ფიცის შემდეგ დერეფნებში ნამდვილი დეტექტივი დაიწყო. დამალული წერილისკენ მიმავალი გზა რთული იყო, სავსე მინიშნებებით… მოსწავლეების ემოციები პიკს აღწევდა ყოველი ახალი პასუხის პოვნისას; ეს იყო ნამდვილი ლიტერატურული დეტექტივი, სადაც თითოეული წამი გადამწყვეტი აღმოჩნდა.

დაძაბული ძიება თამარ ჩოგოვაძის გამარჯვებით დასრულდა — სწორედ მან შეძლო ყველა თავსატეხის ამოხსნა და დამალული წიგნის პოვნა.

აღსანიშნავია, რომ ამ იდუმალი გარემოს შექმნაში მასწავლებელს გვერდით ედგა მე-11 (ა) კლასის მოსწავლე თომა ჭეიშვილი. თომამ არამარტო იზრუნა მინიშნებების საიმედოდ დამალვაზე, არამედ კამერით დააფიქსირა ის გულწრფელი სიხარული და ჟინი, რაც ამ დღეს სკოლაში ტრიალებდა.

ეს დღე კიდევ ერთხელ გვახსენებს, რომ წიგნი ყველაზე დიდი თავგადასავალია!