Englishქართული ენის დღესთან დაკავშირებით, ჩვენს სკოლაში საფუძველი ჩაეყარა ქართული ენისა და ლიტერატურის მასწავლებლის, თამარ ასათიანის (Tamar Asatiani), მნიშვნელოვან პროექტს – „ქართული ენა გვაერთიანებს“.
პროექტის მთავარი მიზანია მოსწავლეებში ეროვნული თვითაღქმის გაძლიერება, მსოფლიოს სხვადასხვა წერტილში გაფანტულ ქართულ სათვისტომოებთან დაკავშირება, ემიგრაციაში მყოფი ქართველი ბავშვების ჩვენი საზოგადოებისთვის გაცნობა და, რაც ყველაზე მთავარია, ქართული ენის პოპულარიზაცია საზღვრებს მიღმა.
ამავე პროექტის ფარგლებში, მე-6 კლასის მოსწავლეებმა, ხელოვნების მასწავლებლის, ქრისტინა სირაძის უშუალო მონაწილეობითა და ხელმძღვანელობით, უნიკალური ხელნაკეთი წიგნი დაამზადეს, რაც აქტივობის ერთ-ერთი გამორჩეული ნაწილი იყო.
ღონისძიების ფარგლებში განსაკუთრებული და ემოციური იყო საიდ გიორგი მულიანის მიმართვა. ფერეიდნელმა ქართველმა, რომელიც წლებია საქართველოში მოღვაწეობს, კიდევ ერთხელ შეგვახსენა ენის შენარჩუნების ფასი და ძალა.
გერმანიაში მცხოვრებმა ქართველმა მოსწავლეებმა კი ვიდეომიმართვის საშუალებით საკუთარ თანატოლებს საქართველოში მეგობრობისა და ერთობის სურვილი გაუზიარეს.
პროექტის ფარგლებში დაგეგმილია მუდმივი უკუკავშირი და დიასპორასთან კონტაქტების გაძლიერება. ჩვენ გვჯერა, რომ ქართული ენა არის ის უხილავი ძაფი, რომელიც ყველა ქართველს, სამშობლოში თუ მისგან შორს მცხოვრებს, ერთმანეთთან აკავშირებს.
14 აპრილი ქართული ენის დღეა! ჩვენს სკოლაში ეს უმნიშვნელოვანესი თარიღი ტრადიციულად, თუმცა სრულიად გამორჩეული, მრავალფეროვანი და შემეცნებითი აქტივობებით აღინიშნა. სახელმწიფო ენის დღის აღნიშვნა არ არის მხოლოდ წარსულის გახსენება, ეს არის ჩვენი იდენტობის, კულტურისა და ისტორიის ცოცხალი პროცესი, რომელშიც მომავალი თაობების ჩართულობას სასიცოცხლო მნიშვნელობა აქვს.
წლევანდელი კვირეული განსაკუთრებით საინტერესო აღმოჩნდა სახელმწიფო ენის კათედრის წევრის, ქართული ენისა და ლიტერატურის მასწავლებლის, ლიკა თეგეტაშვილის ავტორობითა და უშუალო ხელმძღვანელობით განხორციელებული პროექტებით. მისმა ინოვაციურმა მიდგომებმა და მოსწავლეების, განსაკუთრებით კი VII-ე კლასის აქტიურმა ჩართულობამ, ენის სწავლება ნამდვილ დღესასწაულად აქცია.
წარმოგიდგენთ პროექტის ფარგლებში განხორციელებულ მთავარ აქტივობებს:
სამაგიდო თამაში „ქართული ენის ლაბირინთი“ – მოსწავლეებმა კითხვა-პასუხის ფორმატით იმოგზაურეს ქართული დამწერლობის სამივე ეპოქაში. თამაშში ჩართული იყო ენობრივი ხაფანგებიც ბარბარიზმების სახით. ამგვარი მიდგომა მოსწავლეს ეხმარება, აზარტულ და სახალისო პროცესში გაიაზროს ენის სიწმინდის დაცვის აუცილებლობა და დაიმახსოვროს მნიშვნელოვანი ისტორიული მოვლენები.
წარმოდგენა „იმერული სტუმართმასპინძლობა და დიალექტები“ – ტრადიციული იმერული ოდის გარემოში გაცოცხლდა მივიწყებული დიალექტური სიტყვები. ინტერაქტიული თამაშით „საიმერეთო“ ბავშვებმა დიალექტური ფრაზები სალიტერატურო ენით განმარტეს. ეს მოსწავლეებს უვითარებს კუთხური ტრადიციების პატივისცემას, აჩვენებს ენის კულტურულ სიმდიდრეს და წარსულთან ცოცხალ კავშირს ამყარებს.
ფრაზეოლოგიზმების გათამაშება – მოსწავლეებმა თეატრალიზებულად, პირდაპირი მნიშვნელობით განასახიერეს ხატოვანი გამოთქმები. მსგავსი ვიზუალიზაცია მოზარდებს უადვილებს რთული ენობრივი კონსტრუქციების აღქმას და აზიარებს მათ მშობლიური ენის ამოუწურავ ფანტაზიასა და სილამაზეს.
მაკეტი „ქართული დამწერლობის ხე“ – შეიქმნა შთამბეჭდავი ნამუშევარი, სადაც ფესვები ასომთავრულს, ტანი ნუსხურს, ხოლო გვირგვინი მხედრულს განასახიერებდა. გვირგვინის ჯანსაღი ფოთლებისა და ბარბარიზმებით სნეული ტოტების კონტრასტით, მოსწავლეები თვალსაჩინოდ იაზრებენ ენას, როგორც ცოცხალ ორგანიზმს, რომელსაც გაფრთხილება და მუდმივი ზრუნვა სჭირდება.
მსგავსი დღეები და აქტივობები ფასდაუდებელ სარგებელს აძლევს ჩვენს ახალგაზრდებს. მშრალი თეორიული მასალის დაზეპირების ნაცვლად, ისინი პრაქტიკულად და ემოციურად ეხებიან ენის ისტორიას. მოსწავლეებს უვითარდებათ კრიტიკული აზროვნება, შემოქმედებითი უნარები და გუნდური მუშაობის პრინციპები. რაც მთავარია, უყალიბდებათ პასუხისმგებლობის გრძნობა — იცავენ მშობლიურ ენას და სწავლობენ, რომ ენა ცოცხალი საუნჯეა, რომელსაც ყოველდღიური მოფრთხილება სჭირდება.
23 აპრილს ქუთაისის N30 საჯარო სკოლის სააქტო დარბაზში VIII-დ კლასის მოსწავლეებისთვის ინგლისურ ენაზე ინტერდისციპლინარული, ინტეგრირებული ვიქტორინა გაიმართა.
აღსანიშნავია, რომ მსგავსი თანამედროვე და ინოვაციური აქტივობების სასწავლო პროცესში დანერგვის იდეა სკოლის დირექტორს, ბატონ მიხეილ გიორგაძეს (მიხეილ გიორგაძე) ეკუთვნის.
მოსწავლეებმა ცოდნა ისეთ მნიშვნელოვან და მრავალფეროვან საგნებში გამოცადეს, როგორიცაა ისტორია, გეოგრაფია, სპორტი და მდგრადი განვითარება.
ვიქტორინა თანამედროვე პლატფორმა “კაჰუთზე” (Kahoot) იყო აგებული, რაც მოსწავლეებისთვის სრულიად ახალი და ძალიან საინტერესო გამოცდილება აღმოჩნდა.
პროცესმა უაღრესად დაძაბულად, აზარტულად და მხიარულად წარიმართა სკოლის ადმინისტრაციის, პედაგოგების, მშობლებისა და მოსწავლეების თანდასწრებით.
ვულოცავთ გამარჯვებულ გუნდს — „ნიუტონის ვაშლს“!
მსგავსი სახის ვიქტორინები მოსწავლეებისთვის მხოლოდ გასართობი პროცესი არ არის, ეს თანამედროვე განათლების ერთ-ერთი ყველაზე ეფექტური ინსტრუმენტია.
ჩვენი მიზანია გავზარდოთ მოსწავლეების მოტივაცია, მათი მაქსიმალური ჩართულობა და ინტერესი სასწავლო პროცესისადმი.
გვსურს გავთავისუფლდეთ რუტინისაგან, დავძლიოთ ერთფეროვნება და ვაჩვენოთ ბავშვებს, რომ შემეცნება არ უკავშირდება მხოლოდ “მოსაწყენ” შრომას.
მნიშვნელოვანია შევქმნათ პოზიტიური გარემო და სწავლა დავაკავშიროთ კარგ განწყობასთან, მხიარულებასთან და დადებით ემოციებთან, რაც ინფორმაციის ათვისების საუკეთესო წინაპირობაა.
განსაკუთრებული მადლობა ამ დღის შემოქმედთ, პროექტის ორგანიზატორებს: VIII-დ კლასის ხელმძღვანელს — ისტორიის, სამოქალაქო განათლებისა და მეწარმეობის საფუძვლების მასწავლებელს, ფარსმან ფორჩხიძეს (Parsman Porchkhidze) და ინგლისური ენის პედაგოგს, ნესტან კუპრაშვილს (Nestani Kuprashvili), რომლებმაც უდიდესი შრომა გასწიეს მოსწავლეებისთვის ამ ინოვაციური და შთამბეჭდავი გარემოს შესაქმნელად.
ეს მხოლოდ დასაწყისია და მსგავს შემეცნებით, სახალისო აქტივობებში პერიოდულად სკოლის სხვადასხვა კლასი ჩაერთვება.
