ქართულად7/2 კლასის დამრიგებელის, თამარ კვარაკვახიძის ინიციატივით და სპორტის მასწავლებლების- ავთო გორგიძისა და გოგა ძაგნიძის მხარდაჭერით , 12 ივნისს სკოლის სპორტდარბაზში ჩატარდა ფრენბურთის მეგობრული შეჯიბრი მშობლებსა და მოსწავლეებს შორის.
სპორტული შეჯიბრების მთავარი მიზანი იყო ოჯახისა და სკოლის თანამშრომლობის გაძლიერება, ერთმანეთის მხარდაჭერისა და გუნდური უნარების განვითარება.
მსგავსი აქტივობები ხელს უწყობს:
მშობლებისა და შვილების ურთიერთობის გაღრმავებას;
მოსწავლეთა მოტივაციის ამაღლებას
თანამშრომლობის, პასუხისმგებლობისა და ჯანსაღი კონკურენციის განვითარებას;
პოზიტიური და მეგობრული სასწავლო გარემოს შექმნას.
შეჯიბრის განმავლობაში დარბაზი სავსე იყო კლასელების სიხარულით, ღიმილითა და მხარდაჭერით. თითოეულმა მონაწილემ კიდევ ერთხელ იგრძნო, რომ სკოლა მხოლოდ ცოდნის მიღების ადგილი კი არა, არამედ დიდი ოჯახია, სადაც ერთად მიღწეული წარმატება ყველაზე ძვირფასია.
მადლობა ყველა მშობელსა და მოსწავლეს აქტიური ჩართულობისთვის, ენთუზიაზმისთვის .
ყველა ერთად ვქმნით სკოლას, სადაც სწავლა, მეგობრობა და თანამშრომლობა წარმატების საფუძველია
ქუთაისის N30 საჯარო სკოლაში წარმატებით მიმდინარეობს ინგლისური ენის მასწავლებლის, რიტა რატიანის მიერ ორგანიზებული ინტელექტუალური თამაში „სეპტაგონი“. ამჯერად საგანმანათლებლო ასპარეზობაში მერვე კლასის მოსწავლეებმა მიიღეს მონაწილეობა.
პროექტის მთავარი მიზანი პროგრამით გათვალისწინებული მასალის განმტკიცება და ზოგადი ცოდნის პრაქტიკაში გამოყენებაა. თამაში მნიშვნელოვან სარგებელს ატარებს: იგი მოსწავლეებს ეხმარება გუნდური მუშაობის უნარების გამომუშავებაში, ავითარებს კრიტიკულ და ლოგიკურ აზროვნებას და სწავლის პროცესს ბევრად უფრო საინტერესოსა და ხალისიანს ხდის.
წესები საკმაოდ დინამიკური და აზარტულია. მოსწავლეები სკოლის ტერიტორიაზე არსებულ 7 განსხვავებულ ლოკაციაზე ინაცვლებენ და 7 მასწავლებლის მიერ მომზადებულ დაბრკოლებებს ლახავენ. მოპოვებულ კითხვებზე სწორი პასუხის გაცემის სანაცვლოდ კი გუნდები სპეციალურ მონეტებს — „სეპტაგონებს“ აგროვებენ. თითოეულ კლასს წარმოადგენს ერთი დამოუკიდებელი გუნდი, გამარჯვებული კი ის იქნება, ვინც ყველაზე მეტ მონეტას დააგროვებს.
აღსანიშნავია, რომ პროცესში მთელი სასკოლო საზოგადოებაა აქტიურად ჩართული. ყველა მონაწილისთვის თამაში აღმოჩნდა არა მხოლოდ სახალისო, არამედ უდიდესი მოტივაციის მომცემი. მსგავსი ფორმატის პროექტები მოსწავლეებს უბიძგებს, კიდევ უფრო კონცენტრირებულად და სიღრმისეულად შეისწავლონ მასალა სამომავლოდ უკეთესი შედეგების მისაღწევად.
ინტელექტუალური მარათონი გრძელდება. დაელოდეთ სიახლეებს
სსიპ ქალაქ ქუთაისის №30 საჯარო სკოლაში ქართული ენისა და ლიტერატურის მასწავლებლის, ნანა კახიძის ხელმძღვანელობით, სასკოლო ლიტერატურული ბანაკის მეორე სეზონი იწყება!
ბანაკი 22 ივნისიდან 26 ივნისის ჩათვლით გასტანს. წინ უაღრესად საინტერესო, შემოქმედებითი და სახალისო დღეები გველოდება!
ჩვენი ბანაკის მთავარი მიზნებია, არაფორმალურ გარემოში დავეხმაროთ მოსწავლეებს:
წიგნიერების ამაღლებაში — ერთად წავიკითხავთ და განვიხილავთ საინტერესო ლიტერატურულ ნაწარმოებებს;
კომუნიკაციის უნარების განვითარებაში — ბავშვები ისწავლიან საკუთარი აზრის თავისუფლად და არგუმენტირებულად გამოხატვას;
თანატოლებთან დაახლოებაში — შევქმნით მეგობრულ გარემოს ახალი ურთიერთობებისა და გუნდური მუშაობისთვის;
დამოუკიდებლობის შეგრძნების ამაღლებაში — შევუწყობთ ხელს სხვადასხვა პრაქტიკული უნარის განვითარებას;
სკოლის შეყვარებაში — სასკოლო სივრცეს მათთვის მყუდრო, მეორე სახლად ვაქციოთ.
მნიშვნელოვანი დეტალები მონაწილეებისთვის:
ბანაკში მონაწილეობა შეუძლიათ მე-7 და მე-8 კლასის მოსწავლეებს;
ადგილები შეზღუდულია — პროექტის ფარგლებში მივიღებთ მხოლოდ 25 ბავშვს.
იჩქარეთ, გაატარეთ ზაფხულის დაუვიწყარი დღეები ჩვენთან ერთად!
P.S. რეგისტრაციის ბმული გამოქვეყნდება ამ პარასკევს, ზუსტად 09:00 საათზე. არ გამოტოვოთ!
