ქართულად14 აპრილს საქართველო დედაენის დღეს აღნიშნავს. 1978 წლის 14 აპრილს თბილისში, რუსთაველის გამზირზე გამოსული რამდენიმე ათასი ადამიანი წინ აღუდგა საბჭოთა კავშირის ხელმძღვანელობის ნებას და არ დაუშვა საბჭოთა კონსტიტუციაში შესულიყო ცვლილება, რომლის მიხედვით, ქართული ენა კარგავდა სახელმწიფო ენის სტატუსს.
მნიშვნელოვანია გააზრება იმისა, რომ მშობლიური ენა აყალიბებს ეროვნულ იდენტობასა და ეროვნულ სულისკვეთებას.
სსიპ ქალაქ ქუთაისის N30 საჯარო სკოლის სახელმწიფო ენის კათედრამ დედაენის დღის აღსანიშნავად არაერთი ღონისძიება განახორციელა, მათ შორის, ქვიზი- „როგორ იცნობ ქართულ ენასა და მის ისტორიას“, რომელიც მიზნად ისახავდა მოსწავლეთა ენობრივი კომპეტენციებისა და ენის ისტორიის ცოდნის წარმოჩენას. გამოკითხვაში მონაწილეობა VIII-IX კლასების 200-ამდე მოსწავლემ მიიღო, შედეგები ძალიან საინტერესო და საიმედო იყო!
ჩვენი სკოლის დაწყებითი საფეხურის მოსწავლეებმა დაამზადეს ქართული ენისადმი მიძღვნილი ბუკლეტები, რომლებშიც წარმოჩენილია დედაენის მნიშვნელობა, მშობლიური ენის ზრუნვისა და დაცვის აუცილებლობა. ბუკლეტებში დაბეჭდილი იყო ბარბარიზმები და მათი შესატყვისი სწორი ფორმები, რაც მკითხველის ყურადღებას ამახვილებდა ენის სიწმინდის აუცილებლობასა და ვალდებულებაზე.
ჩვენი სკოლის მეწარმეობის საინიციატივო ჯგუფმა სახელმწიფო ენის კათედრასთან ურთიერთთანამშრომლობით მოაწყო ექსპოზიცია, რომელზეც გამოფენილი იყო სპეციალურად დედაენის დღისათვის დამზადებული ხელნაკეთი კალმები, სანიშნეები, მაგნიტური სუვენირები, სტიკერები რომლებზეც დატანილი იყო ქართველი მოაზროვნეების გამოსახულებები და მათი გამონათქვამები მშობლიურ ენასთან დაკავშირებით.
გამოფენამ, რომლითაც განსაკუთრებით დაინტერესდნენ სკოლის მოსწავლე-მასწავლებლები, კიდევ უფრო მრავალფეროვანი გახადა დედაენისადმი მიძღვნილი კვირეული.
14 აპრილს “დედაენის” დღესთან დაკავშირებით სკოლაში მოეწყო “ანბანის პოდიუმი”, რომლის მიზანი ქართული კულტურული მემკვიდრეობის პოპულარიზაცია და უკეთესად აღქმა იყო. მოსწავლეებმა და მშობლებმა ერთობლივად დაამზადეს ანბანის პლაკატები, რომლებზეც დატანილი იყო ასო-ბგერის შესაბამისი ნახატები. ასევე, წარმოადგინეს თითოეული ასო-ბგერის შესაბამისი ნივთებიც. პირველკლასელებმა ამ აქტივობით შესწავლილი ანბანიც შეაჯამეს. იდეა განახორციელა I/4 კლასმა თიკო კახიძის ხელმძღვანელობით
