ქართულად30-ე სკოლის საზოგადოება უამრავი მუსიკალური, შემოქმედებითი პროექტის მომსწრეა. მუსიკა რომ სულის საზრდოა, ეს უდავოა. ქართველებიც გამორჩეულად მუსიკალურები ვართ. თითქმის ყველა ქართული ოჯახიდან ისმის ხმაშეწყობილი ჰანგები.
2025 წლის 13 ივნისის მუსიკალური საღამო კი იმით გამოირჩევა, რომ ამ ჰანგებმა ოჯახებიდან სკოლის სცენაზე გადმოინაცვლეს და დამსწრე საზოგადოებას შრომატევადი და დამღლელი წლის ბოლოს თბილი და სასიამოვნო ემოციები აჩუქეს. ღონისძიება დაამშვენა სკოლის სხვადასხვა კლასის მოსწავლეთა ოჯახურმა ანსამბლებმა დედების, და-ძმების და სხვა ოჯახის წევრების ჩართულობით.
სიმბოლურია, რომ მუსიკალური ბგერების ჰარმონიული შერწყმის და შეთანხმებული ჟღერადობის შედეგად იქმნება ულამაზესი მელოდიები და მუსიკალური შედევრები, ისევე, როგორც ოჯახისა და სკოლის გვერდით დგომით მოსწავლეს უყალიბდება სწორი ღირებულებები და ცხოვრების სარბიელზე გადის თამამი, თავდაჯერებული და სწორი თვითშეფასებით. პროექტის მთავარი იდეა და მიზანიც სწორედ ეს იყო მუსიკალური უნარ-ჩვევების, გემოვნების ჩამოყალიბების, კულტურული ქცევის დახვეწა განვითარებასთან ერთად.
